مافيش حياه من غير أمل
شعر الهام شحاتة سالم
--------------------
شد الخيوط من فوق -
جبين الشمس ـ
وارميها للقمر
اكتب وخطط ياقلم
وافرش شعاع الشمس
فوق كل الصور...
وماتتجاهلش حبيبتى
دى زى القمر
وافرد على جبينها الضياء
واعلن على الدنيا الفرح
وافرش بساطك من جديد
دا الخير طرح
غصن الزيتون ضلل على البنت الأمل
واحكى الحكايه من جديد
راح يجى يوم ويكون سعيد
وافرد شعاع من نن عين الشمس
فوق خد الحبيبه المخلصه
امحى الحكاوى الميته
واحيى الأمل تانى من جديد
كل الساعات
كل اللى فات
اصبح رفات !!
ومفيش حياه من غير امل
ابنى لى دار
جوه العيون الصافية
فى قلب الوطن
وافرش خطاوى سكتك
مد الايدين وارفع لى
صوتك بالغنا
تلقى الصعاب صارت حقيقى ممكنه
وافرش ورودى فى كل كل الامكنه
مد الخطاوى ياولد
ترجع بهيه من جديد
وافتح طريق الامنيات
واعلن بداية المستحيل
جوه الشوارع والحارات
كحل عيونى بالأمل ـ
مصر البهيه المستحيله
بتناديك عاشق
أنا عاشق متيم ياحببتى
بالوله مدى الشروق
وابنى لى بيت يكسر رتابة الملل
قوم يا ولد لف البلاد
عدى البحور
وابنى الجسور
عدى الجبال
دوس ع التلال
انا مهرى من دم الشهيد
كحل عيونى بالبطوله
والأمل هاتكون
اكيد فجرى الجديد
خارج من الدم السواد
فارس لنا
وكل العباد مستنياك
اوعاك تتوه فى السكة
ويضيع الأمل
------------------------
من ديوان ( مجروحة )
للشاعرة الهام شحاتة سالم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تعليقات
إرسال تعليق