المقدر والمكتوب
المقدر والمكتوب شىء محسوم واكيد هايصيبك
ان كان فرح ولا هموم ارضى بقدرك ويا نصيبك
ان كان غيبى او معلوم مش هايفيد زعلك ونحيبك
خد م الزرع الاخضر فكره يرمى حموله على مولاه
لا يفكر فى اليوم او بكره ولا يبكى ويقول الاه
شوف الطير طاير بجناح ياتى برزقه ثم يعود
ولاهمه امطار ورياح ولا اى فواصل وحدود
والعصفوره صوتها بديع تلقط حبه وترضى صغارها
مش خايفه رزقها لايضيع عارفه طريقها \ عارفه مصارها\
والاسماك فى البحر تعوم وعارفه ان الرب حاميها
لا بتتعصب ولا بتلوم مين يعالجها ومين يداويها
شوف الهدهد طاير فوق وبيتراقص ع الانغام
يذكر ربه فى كل شروق عمره ماياكل لقمه حرام
حتى الدوده فى بطن الارض رزقها اتى ده شىء مضمون
ولاتترك سنه ولا فرض ولا تعرف تكذب وتخون
ارضى ياابنى بالمقسوم تلقى الرزق فى كل مكان
ليه تغضب وتعيش مهموم ليه تبكى وتبات حيران
انت مقصر فى صلاه وصوم حتى نسيت انك انسان
يا ابنى غير نفسك ماتلوم ارضى بقدرك عيش فرحان
شعر احمداسماعيل \شاعر العرب
تعليقات
إرسال تعليق