العيال كبرت يا أمى
شعر /محمد عبد الجواد
::::::
العيال كبرت يا امى وكبرونى
كل يوم الخوف بيكر
والحنين بيزيد ظنونى
كل همك انى يبقى ليا عيلة
عيشتى عمرك تحلمى ايام طويلة
وتقولى لى نفسى اشوفك يوم عريس
عايزة اشوف لك كام حفيد
اصلك انت يا ضى عينى
عشت واتربيت وحيد
عايزة بنت وكام ولد
يبقوا غنوة للبلد
عايزة عودك يبقى مصلوب بالعيال
دا العيال يا ولدى عزوة
دول سند وبيعطوا قوة
لما تكبر يسندوك ويشيلوك
يلا يا ابنى شوف عروسة بنت ناس
تسندك وتعيش معاك وتبقى ليك
ام العيال
واوعى مرة تيجى تتعصب عليها
اوعى تبكى يوم عينها
ده شئ محال
ابقى صادق دوم معاها
الصدق من شيم الرجال
يوم فرحنا كنت قاعدة زى ملكة
الحريم بيباركوا ليكى
والرجال بيهنوا فيكى
دمعتك حنت عينكى
وضحكتك رقصت بسرعة بين اديكى
خلاص يا أمى بقيت انا ابو العيال
جبت بنت وكام ولد
أملى يبقوا لى سند
والحكاية فى كلمتين ونقول مدد
23 اكتوبر 2000
الكبيرة شايلة اسمك
ايوه فاطمة
بنت شاطرة وبرضو فاهمة
بس مشكلة المشاكل
انها شيفانى عنتر
كل يوم قدامها بكبر
هى عبلة
ترسم الاحلام فى دفتر
وتنادينى بابا شوف
قد ايه حلوة الحروف
كل حاجة فيها اسمك
تبتسم تظهر ملامحك
لما تغضب كل شئ
فى الكون يخافك
تبقى بركان صوته يزأر
بنتى يا امه حتة منك
فيها ريحتك فيها اسمك
حتى ياامه وارثة صبرك
فيها حاجة حلوة خالص
انها زى القمر
6 اكتوبر 2002
جبت يا أمه كمان ولد
والولد على اسم ابويا
قلت راح اسميه على
كل حاجة فيه جميلة
شعره ناعم .. ثغره باسم
بس متعصب شوية
كل يوم قدامى يكبر
فالفرح يدخل عليا
والحنين للماضى يجي
يهز فيا
رغم انه ما شافشى جده
بس هو حتة منه
وشه كله زارعه صبر
لما يضحك فوق جبينه
يترسم مليون قمر
لما يبكى ينحى له الشجر
رغم ان عمره لسه يا أمه
يادوب 15 ربيع
بس علمه زى جده
حافظ التاريخ فى عقله
كأنه سر
واد جدع عارف حدوده
فى المحن بيشد عوده
وارث الصبر وراثة من جدوده
عارفة يا امه انا شايفه ايه ؟
شايفه نخلة واقفة حارسة النيل حراسة
وشه ياأمه فيها فراسة
زى ارض حبيبته مصر
21 سبتمبر 2005
مر ياأمه من جوازى 5 سنين
كلهم حب وحنين
بس فيه شوية مشاكل
والحياة من غير مشاكل
تبقى عاملة زى عيش من غير طحين
وانتى عارفة ان انا طول عمرى صابر
فيا يا أمه شئ الهى ان انا اقدر اعافر
والمشاكل باحتويها وبرضو قادر
وادى يا امه حفيد جديد
جالنا من غير انتظار
قلت أغير فى الاسامى
عملت قرعة لاجل أحسن الاختيار
والورق قلبته ياما
بجد يا أمه ومش هزار
فى النهاية طلع لى اسمه
اسمه كان صيغة مبالغة
استخرت الله وقلت
يبقى اسم الواد عمار
شكله يا أمه زى اخوه
وارث الضحكة من أبوه
انت عارفة اننا ناس فلاحين
وان اى واد مش جاى لابوه
ناس كتير بفضول بتسأل
هم دول من فين دول جابوه ؟
حتى ده كمان كبر
كمل 12 ربيع
بس عارف واد فظيع
الشقاوة طبع فيه
والذكاء زى الشعاع
بيهل يا أمه من عنيه
بس هو واد حنين
رغم اعصار الشقاوة
اللى فيه واد ساكنه سحر
30 سبتمبر2012
بعد يا امه ما صار معايا 3 عيال
قلت عال
ربى هيعنى عليهم
أفنى عمرى واشتريهم
بس همى زاد شوية
والحياة دى حاجة صعبة
والظروف دايما معاندة
ثورة قامت غيرت كل الخطط
والاسود صارت قطط
واللى كانوا ما يساووش
فجأة يا أمه بقوا وحوش
كل يوم فى شئ جديد
والقلوب صارت حديد
والمشاعر من جليد
النفوس اتغيرت
والتاريخ مبقاش مفيد
البشر زادت غباوة
والشوارع لابسه توب كل قساوة
والزمن مبقاش زمانى
والفرح غادر مكانى
بس فجأة نادانى هاتف
ان فيه مولود جديد
قلبى داب من الخوف شوية
والزعل عكنن عليا
بس جالى واد ظريف
ضحكته تفتح بيبان الرزق ليه
كان ولد من شكله يا أمه
طريقه سالك
قلت بس ده اسمه مالك
ضحكته ترسم طريقى
كلمته بتبل ريقى
صار صديقى
عارفة مالك عمره صار 5 سنين
لو يغيب عن عينى حبة
بأبقى مجنون مش رزين
واد يفرح من كلامه الاعتيادى
كل حاجة عنده عادى
عنده رد لكل حاجة وببساطة
قاعدته فيها تناكة
ضحكته تهز الاعادى
أما حزن كله صبر
هى دى كل الحكاية
زى ايام السنة 4 فصول
فيها حب زى ايام الشتا
ليلها طويل
والحنين نسمة عصارى
فى مسا يوم صيف جميل
والدموع زى الخريف
دايما هزيل
فيها شوق زى الربيع
نوره يسطع ورده يطلع
عمره ما قال مستحيل
عارفة يا أمه
كل حاجة فيكى حلوة
واختيارك للمدام كان شئ نبيل
تسلمى ليا يا حاجة
ربى يعطيكى يا امى
فوق سنين عمرك كمان
100 الف عمر
تعليقات
إرسال تعليق